Galeguízate

Samaín e Magosto 2011

2011-11-06T09:24:00.000-08:00

O venres 4 de novembro xuntámonos todos na Escola do Busto para celebrarmos o Samaín e máis o Magosto. Nada máis chegar algúns de nós pasamos polo obradoiro de Maquillaxe terrorífico onde nos deixaron así:

Namentras outros elaboraban un terrible monstro de seis ollos (un por cada escola) que logo colamos na parede. Desde alí esculcounos toda a mañá.

Continuamos con diferentes obradoiros: de esqueletes (moi propio para a canción que iamos cantar despois coa profe Nuria),

de "cestos castañeiros" para o Magosto que viría despois,

de pantasmas...

E despois de tanto traballar, tiñamos unha fame "de medo", nunca mellor dito... así que demos boa conta da merenda terrorífica que nos tiñan preparado as mestras/es do CRA.

Ao acabarmos a merenda fixemos unha rolda de cancións do Samaín.

Finalmente, cando chegaron as familias atacamos as castañas e rematamos todos xuntos cantando unha cantiga do Magosto.

Letras Galegas 2011: Lois Pereiro

2011-04-29T14:37:00.000-07:00

O 11 de maio as escolas do CRA de Santa Comba celebraremos conxuntamente o Día das Letras Galegas achegándonos á nosa lingua a través da poesía de Lois Pereiro: un autor de "culto", que ben seguro pasará a ser moi popular.
Elaboraremos entre todos un cartaz conmemorativo, contaremos coa presenza dun conta contos co que visitaremos outras literaturas do mundo. Converterémonos nós mesmos en conta contos das historias do mundo que traballamos na aula. Finalmente faremos unha xincana literaria arredor da obra e da figura de Lois Pereiro.
Ollade, escoitade e desfrutade desta pequena mostra da súa moi recomendábel poesía:

Mundo Lois from Mundo Lois on Vimeo.

PEL 2º trimestre

2011-03-18T16:36:00.000-07:00

PEL 2º trimestre_CRA Santa Comba

Comemos diferente, medramos iguais

2011-02-13T16:25:00.000-08:00

PEL

O NADAL

2011-01-24T03:02:00.000-08:00

Este ano celebramos o Nadal dun xeito moi especial: coñecemos ao Apalpador, un personaxe tradicional galego do Nadal.
O vello Apalpador, ou Pandegueiro como se lle chama en partes das montañas de Ourense, é unha figura lendaria galega que achega os agasallos aos nenos polas datas de Nadal. Este xigante, de oficio carboeiro, baixaba das devesas do Caurel e do oriente ourensán á noitiña do 31 de Decembro e apalpaba as barriguiñas dos cativos. Se estaban cheas dicía: «así, así esteas todo o ano» e deixáballes unha presa de castañas. Senón calaba, pero deixáballes tamén as castañas.

O martes, 21 de decembro, xuntámonos no edificio multiusos de Santa Comba para asistirmos á representación dunha obra de monicreques a cargo da compañía Títeres Cachirulo, titulada A Lenda do Apalpador. Ao rematar, todos os nenos e nenas do CRA botáronlle as cartas, que xa traían escritas da casa.
Logo de afinar as nosas gorxas, saímos polas rúas de Santa Comba a cantar os reis. Entre o noso repertorio tiñamos unha fermosa panxoliña sobre o Apalpador, musicada por Nuria, a nosa mestra de música. Dicía así:

Vaite logo, meu meniño
marcha agora para a camiña
Que vai vir o Apalpador
a apalparche a barriguiña
Xa chegou o día grande
día do noso Señor.
Xa chegou o día grande
e virá o Apalpador.
Mañá é dia de cachela,
que haberá gran nevarada
e há vir o Apalpador
cunha mega de castañas.
Por aquela cemba
xa vén relumbrando
o señor Apalpador
para darvos o aguinaldo.

Ata cantamos algunha panxoliña en inglés que nos aprendera o profe Suso:

Hello reindeer,
Hello snowman,
Hello Santa,
Happy Holidays!

Para rematar a xornada degustamos produtos típicos do Nadal que os pais trouxeran das súas casas. Que bo estaba todo!!

Linguas Cruzadas

2011-01-10T15:42:00.000-08:00

Interesante documental sobre o estado da lingua galega entre a xente nova, emitido na TVG o 17 de maio do 2007. Duración: 49'46''

Neofalantes. Belén Regueira

2010-12-19T14:08:00.000-08:00

Belén Regueira, xornalista da CRTVG, estase a converter en "habitual" no noso blogue. Xa vos convidamos a visualizar a súa intervención na entrega dos Premios Mestre Mateo a prol da nosa língua noutra ocasión. Nesta oportunidade, no colectivo "A nave das ideas", fai unha intervención que é unha brillante ao tempo que divertida "pseudo-conferencia - confesión - parodia" sobre os neofalantes (persoas castelánfalantes que agora son galegofalantes). Botádelle unha ollada:

Neofalantes. Belén Regueira from Sr. Verme on Vimeo.

Celebramos o Samaín e o Magosto no Busto

2010-11-24T14:15:00.000-08:00

O pasado 12 de novembro xuntámonos todas as escolas no Busto para celebrarmos un terrorífico Samaín e un saboroso Magosto. A xornada comezou cun obradoiro de maquillaxe de Samaín e de elaboración de manualidades arrepiantes.

Seguiu cunha peza teatral que contou coa participación dos mestres/as e que deixou a máis dun coa pel de pita. Os alumnos fixeronlle a réplica aos mestres cantando unhas cantigas do Samaín.

Despois, e para repoñerse de tanto susto, degustamos uns exquisitos manxares. Claro que a algún non lle chistou moito ter que comer dedos de bruxa, cadaleitos de morto, ollos de lobo esfameado, pasteis de esqueletes,...

E agardando polas castañas que se estaban a facer, fixemos unha xinkana de xogos "magosteiros". Por fin, cara o final da xornada fóronse achegando as familias para degustar as castañas que asamos alí mesmo. Démoslle remate á xornada bailando todos xuntos (pais/nais, alumnos/as, mestres/as) o baile da castañiña.

Novo curso, novo blogue

2010-11-16T16:00:00.000-08:00

Comezamos a nosa andaina blogueira un pouco tarde este curso, pero é que, como ben sabedes, son demasiadas cousas a que atender no inicio de curso (horarios, programacións,...).

Para abrir este curso deixámosvos o enlace a un novo blogue do centro: EL BAÚL DE LOS DEPORTES, creado por Jose, o mestre de Educación Física e secretario do centro, que se suma tamén ao carro das novas tecnoloxías: benvido compañeiro!!

O CRA Santa Comba organiza o foro AMCRAGA

2010-06-21T03:38:00.001-07:00

Queridos compañeiros e compañeiras de escolas rurais, o próximo venres 25 de xuño agardámosvos en Santa Comba para compartir unha xornada con todos vós. As actividades serán maioritariamente lúdicas e o obxectivo principal será o de establecer relacións que nos axuden a mellorar a nosa práctica docente nun contexto que nos é común a todos.

Andoriña!!

2010-06-15T17:22:00.000-07:00

Xa esta na rúa a nova edición da nosa revista.
Agardamos que vos guste!

DE VIAXE POLA INDIA...

2010-05-30T18:08:00.001-07:00

A India é o segundo país máis poboado do mundo e nel podemos atopar gran cantidade de tesouros culturais. É un país apasionante e coñecelo supón toda unha aventura.
Na escola de San Cristovo estamos viaxando pola India e aprendendo cantidade de cousas: alí a xente ten un grande respeto polos animais (as vacas son animais sagrados!), a vestimenta das mulleres gustounos moito e tamén os adornos que levan os traxes, visitamos monumentos como o Taj Mahal (coa súa fermosa historia de amor), lemos contos tradicionais e tamén aprendimos moito sobre a súa música.

Preme na imaxe para acceder a actividades sobre instrumentos tradicionais da India:

DECORAMOS A NOSA ESCOLA!

2010-05-19T06:52:00.000-07:00

Xa que chegou o bo tempo, decidimos poñer a nosa escola ben bonitiña. Esperemos que non chova para que non marche a pintura. Mirade que linda quedou!

GalegOlimpíadas

2010-05-08T10:49:00.000-07:00

GALEGOLIMPÍADAS

Este ano en Educación Física fixemos unhas olimpíadas de xogos populares, que son os xogos que facían os nosos pais e avós cando tiñan a nosa idade. A verdade é que o pasaban moi ben...
E NÓS TAMÉN!!!

Aquí estamos os nenos de Montouto, Busto e Picotos preparados para a competición... Que ganas de comezar!

Nas escolas fixemos moreas de probas: Carreiras de Sacos, Buxainas, Chapas, Mariola, Salto da Comba, Zancos, O Pano, Petanca...
Nestas fotos, vedes algunhas das competicións que fixemos...
QUE GAÑE O MELLOR!

CHAVE, BOLOS E SOKA-TIRA

O ARO, A MARIOLA E POLIS E CACOS

Diario Acuático

2010-05-08T09:32:00.001-07:00

...A HORA DOS GOLFIÑOS

Como cada ano nos meses de Abril e Maio dedicámonos a mellorar as nosas habilidades acuáticas, a ver se dentro de pouco temos sorte e imos aos xogos olímpicos!!!
Este é o noso Diario Acuático.

09:45. Chegada á piscina... Queremos nadar!!!

10:00. Transformación en Peixes, Quencemento e Exaltación da Amizade...

10:30 Listos e dispostos para a inmersión

10:35. Chega a hora de darlle ás aletas... Pero con moita ledicia.

11:10. Despois do traballo, sempre hai un momento de diversión.

11:15. Fotos dos golfiños máis rápidos de Santa Comba, xunto co socorrista en plena acción... QUE POSE!!!

11:20. Hora de saír, pensando xa nas aventuras do seguinte día... Ata a próxima!!!

O CIRCO DE CRACOVIA CHEGA A SANTA COMBA!

2010-04-28T07:31:00.000-07:00

Señores e señoras, benvidos ao espectáculo máis grande do mundo: o circo de Cracovia!

Chegados dende Boaña, e abrindo a comitiva, aquí tendes a banda do noso circo. Escoitade o ben que sonan os seus instrumentos.
Ei vén o noso circo
O circo de Cracovia
Ei ven o noso circo
Xa chegou a Santa Comba.
Ven correndo miña rula
Que a función vai comezare.

A continuación, aquí tendes dando brincos aos alegres malabaristas. Eles chegan dende Busto. Mirade que destreza teñen manexando as cintas, os platos chinos, as pelotas, as cariocas…

E xa están facendo a súa entrada no escenario os magos que chegan dende Freixeiro. Veñen ataviados coas súas capas e as súas chisteras. Non perdades nin un só detalle porque ao velos seus trucos de maxia quedaredes coa boca aberta.
De seguido, chegados dende Montouto, temos con nós os elefantes cos seus domadores. Menudo equilibrio teñen estes animais tan grandóns. Ollade para eles, xiran arredor das dúas patas traseiras, increíble!

E a continuación, dende Picotos, veñen os paiasos do noso circo. Preparádevos para botar unhas boas gargalladas porque son moi divertidos.
E por fin chegou a actuación máis esperada. Con todos vós os leóns coa súa domadora, chegados dende San Cristovo. Ben atentos porque estes leóns van pasar por un aro de lume, impresionante!

Agora agarrádevos ben ás vosas cadeiras porque van facer a súa entrada os feros tigres. Proceden de Malasia, aínda que agora asentaron en San Salvador. Non teñades medo porque a súa domadora, a toque de látigo, consegue que vaian todos en fila pasando por dentro do aro, fascinante!

E aquí remata a nosa función. Esperamos que vos gustase, e o ano que vén voltaremos a Santa Comba. Un forte aplauso para tódolos artistas do gran circo de Cracovia.

SAÍDA A SANTIAGO

2010-04-28T02:00:00.000-07:00

O día 23 de Outubro do 2009 fomos ao Auditorio de Galicia a vela obra O CASTELO DA ROCHA VELLA, protagonizada polos monicreques de Kukas en colaboración coa Real Filharmonía de Galicia.
Rímonos moitísimo e saímos todos encantados para merendar un pouco.
Debaixo dun finísimo orballo, achegámonos ata o Mosteiro de San Martín Pinario para visitar a exposición “GALICIA DIXITAL”, onde poidemos interactuar con creacións audiovisuais e multimedia.
Que cantidade de cousas chegamos a ver e tocar!

Festa do Nadal

2010-04-27T10:23:00.000-07:00

O día 22 de Decembro celebramos a festa do Nadal: todas as escolas do CRA reunímonos na escola de Busto e pasámolo moi ben.

Primeiro fixemos un "CONCURSO TELEVISIVO" que consistía nun taboeiro de xogos titulado:

Con actividades diversas e moi divertidas. Habia 4 equipos : Equipo Verde " Os renos maxicos " , Equipo Amarelo " Os elfos de Papa Noel ", Equipo Vermello " Folerpa de Neve ", Equipo Azul " Barbas Brancas "

Guiados por unhas estupendas azafatas

O final o equipo que gañou, foi o Equipo Vermello " Folerpa de Neve " Tamen tivemos uns artistas invitados que eran os profesores disfrazados

Carlos Baute e Marta Sanchez Miguel Bose e Bimba Bose

Fito Nena da Conte

Bisbal Chiquilicuatre e a suas chicas

Rosana Bob Esponja

Andres Dobarro Julieta Venegas

¡¡ Cantos artistas chegaron a Santa Comba !!

Despois visitounos PAPA NOEL que entregounos a todos un agasallo, por último comemos productos típicos do Nadal : mazapáns, polvorons, .. etc. e ! CHOCOLATE ¡ !! QUE GUAY ¡¡ solo nos faltaron os CHURROS.

FOI UN DIA DE CONVIVENCIA DE TODO O C.R.A. E MOI DIVERTIDO. PASAMOLO MOI BEN.

O NOTICIEIRO DO BUSTO

2010-04-24T05:23:00.000-07:00

Os nenos e nenas da Escola do Busto familiarízanse cos xornais na clase

E despois deciden sair a rúa para informarse dalgunhas novas de actualidade que aconteceron estes días na súa aldea.

LÚA PARIU DOUS CADELIÑOS

A cadela de Adrián trouxo dous canciños, marrós e brancos. Hoxe fomos coñecelos no recreo e xogamos un pouco con eles. Pasámolo moi ben aínda que Lúa non se deixou fotografiar. Estaba moi nerviosa coa nosa visita.

TRES MICHIÑOS MOI SUAVES

Na eira de Zaira e Adrián atopamos tres michiños que moito nos molaron!

UN CABRITIÑO MOI FEITO E OUTROS MOI MAMÓNS

Esta “cousiña” fermosa naceu onte. - Non sei a quen semella, pois a súa mamá é branca e o seu papá tamén! Aínda non sei como lle vou chamar! –Di Mariví.

UN PAVO REAL TÍMIDO

Na leira de Mariví había gran variedade de animais. Entre as aves que alí vimos, o que máis nos chamou a atención foi o pavo real. Cando chegamos tiña o seu abanico extendido pero despois, ao vernos, recolleuno.

ADOPTAMOS DOUS CABRITIÑOS

E como despedida desta experiencia esta foto de grupo cos dous cabritiños que pensamos adoptar se a familia de Mariví nos deixa. Sabemos que á familia CABRA non lle agradou moito a nosa visita. Patricia di que en vez de balar beeee! Semellaba que dicían – Socooorooo! Mamááááá! Fóra neeeeeenooooos!
Nós marchamos moi ledos e con ganas de voltar. Agradecemos moito a colaboración das familias do Busto.

Divertimonos cos libros

2010-04-21T02:59:00.000-07:00

Na escola de San Salvador durante este curso fixemos un recanto no cal iamos colocando libros que atopabamos relacionados cos temas que traballabamos na aula:o Samaín e o Magosto, o Nadal, o Entroido e o Circo, as Estacións, o" Quixote", o Arte, as Vacacións,...

Con motivo disto o Día do Libro o conmemoramos dunha maneira especial realizando unhas actividades moi amenas e interesantes:
- Falamos de Cervantes e da conmemoración do Día do Libro.

- Escoitamos a canción "O libro máxico" do grupo Migallas.
- Buscamos libros, páxinas web... que falaran de Cervantes e da sua obra "Don Quijote".

-Limos o libro"Don Quixote e Breogán na aventura dos muiños" de Anxo Fariña.

-Vimos como se fai un libro explicado polos Bolechas.

-Realizamos un marcapáxinas coas caras de Cervantes e de Don Quixote.

-Coloreamos debuxos do Día do Libro e de Don Quixote que colocamos nun pequeno mural .

Como broche final os nenos/as levamos un diploma por participar nesta actividade.

Convidados de honra no día das Letras Galegas 2010

2010-04-20T16:32:00.000-07:00

A Sra.Concepción de San Salvador e Xabier Díaz (Berrogüetto), compartirán connosco a celebración do día das nosas Letras.

"A música popular e a música de raíz, ten esa cualidade como de estar unida polas estrelas non importa que sexas doutro sitio para percibir a emoción que hai implícita nela."
"Eu creo que sería interesante que a música deste país tivese unha imaxe propia fóra. Que non fose identificada como un "totus" do que é a música española, porque en realidade non o é."
"Eu tomei a miña elección. A miña elección está clara: eu teño unha lingua propia e é a que emprego para construir a miña música.Creo que é unha lingua absolutamente musical que funciona maravillosamente ben, e van unidas. Non entendo a unha sen a outra."

"A música foi un vehículo de expresión no que transportar moitísima información que ten a ver coa lingua: moitísimas palabras e expresións. E toda esa xente o fixo. E por iso estou por un lado agradecido e por outro triste porque as xeracións seguintes, moitos dos fillos desta xente, non querían ver esa parte dos seus pais."
"Eu en todo caso son partidario de convencer aos castelán-falantes con amor. Paréceme moito máis interesante. Entón, eu fálolles e cóntolles os meus contos en galego, e fágoo con todo o cariño do mundo para que se dean conta de que temos unha lingua absolutamente maravillosa."
"Precisamos que teñan (as novas xeracións) unha certa conciencia de que existe un idioma neste país que hai xente que cantamos nese idioma, e para que se poidan achegar dalgún xeito á nosa música sen que lles pareza algo exótico..."
"A mellor decisión que tomei na miña vida foi virme a vivir ao rural. Eu era un urbanita que estaba moi inconforme coa miña vida e agora estou moi contento. Creo que se pode estar no mundo e viaxar por todo o mundo e vivir na aldea. É absolutamente maravillosa a perspectiva de todo o que se está a facer no mundo pero desde aquí, desde a aldea."

Imos de excursión!

2010-04-15T11:11:00.000-07:00

En Picotos temos todo un acontecemento que contarvos. A nosa compañeria Noelia ten un pony!. Tanto nos falou del que quixemos ir a coñecelo aproveitando os primeiros raios de sol da primavera. Chámase Lucas e é moi manso. Puidemos tocalo e ata lle demos de comer. Despois do paseo todos temos clara unha cousa: Queremos un pony, please!

A semana da prensa

2010-04-15T10:55:00.000-07:00

Dende o 12 ao 18 de Marzo no noso CRA celebramos a semana da prensa. No colexio de Picotos estivemos a traballar con xornais e revistas escritos en galego, castelán e inglés. Chamounos a atención o tamaño dalgúns dos xornais ingleses coñecidos como tabloides, case non eramos capaces de pasar as follas do grandes que eran!. Despois de coñecer un pouco mais a fondo o mundo da prensa decidimos facer un collage e aínda nos sobrou papel para poder facer uns gorros. Mirade que bonitos nos quedaron!

Cantares de reis

2010-04-13T17:19:00.000-07:00

Na tradición oral galega atopamos os populares cantares de reis, que tiñan como un dos principais motivos recoller o aguinaldo dos veciños.

Tamén coñecidos como reises ou aguinaldos, os cantares de reis eran pequenas composicións que cantaban de porta en porta os habitantes dos lugares e parroquias, e que na súa meirande parte narraban a historia do nacemento do neno Xesús e a chegada dos reis Magos cos seus agasallos.

Estes cantares adoitaban ter tres partes: a petición de licenza para o canto, a cantiga propiamente dita e finalmente, a petición do aguinaldo, que normalmente consistía en doces ou diñeiro.

A Sra. Concepción de San Salvador, que se lembra moi ben deste costume, cántanos un deses cantares de reis:

Os nosos videos...

2010-04-12T17:19:00.000-07:00

Xa temos canle en YouTube! Proximamente iremos engadindo os videos que realizamos dende o noso centro.

TRABALLANDO COS XORNAIS

2010-04-12T03:58:00.000-07:00

Durante a semana do xornal na aula os nenos/as de San Salvador estivemos traballando con xornais escritos en distintas linguas e ao rematar fixemos un pequeno mural cos nomes dos distintos xornais que folleamos.

ANACOS DA NOSA MEMORIA: Sra. Concepción de San Salvador

2010-03-24T13:36:00.000-07:00

A Asociación Cultural e Pedagóxica Ponte...nas ondas! realizará a través de Internet a XVI edición da xornada multimedia de comunicación interescolar, que terá lugar o 16 de abril. Esta xornada de comunicación xirará arredor do tema O TESOURO DOS AVÓS e nela poden participar todos os centros educativos que o desexen aportando material audiovisual ou radiofónico. Pareceunos moi interesante sumarnos a esta iniciativa que pretende valorar os coñecementos dos nosos maiores e fomentar as relacións entre diferentes xeracións.

Velaquí tedes a nosa aportación:

Este video realizouse dende o ENDL do noso centro, dentro do proxecto "Anacos da nosa memoria", co obxectivo de dar a coñecer o patrimonio immaterial da zona. Esta primeira reportaxe está dedicada á Sra. Concepción de San Salvador, a quen queremos agradecerlle todos os bos momentos que nos fai pasar transmitíndonos os seus recordos e a súa alegría.

Queremos tamén enviarlle un agradecemento especial a Xabier Díaz, a quen tamén escoitamos neste video coa súa fantástica interpretación na "Muiñeira de San Salvador de Padreiro" (tema do seu disco "Coplas para Icía").

Congreso Internacional: 15 anos de "Ponte nas ondas"

2010-03-24T12:53:00.000-07:00

O Verbum - Casa das Palabras, en Vigo e máis a Casa da Cultura de Melgaço acollerán entre o 23 e o 25 de abril o Congreso Internacional "Pontes de Cultura, Pontes de Futuro" que conmemora 15 anos da iniciativa "Ponte... nas ondas!". Unha importante representación de figuras destacadas da comunicación e do patrimono inmaterial galego-portugués reflexionarán sobre a traxectoria de "Ponte...nas ondas!" nestes 15 anos e sobre a importancia do patrimonio cultural común para o futuro da Eurorrexión Galiza-Norte de Portugal. Convócase ao profesorado galego e portugués a participar no Congreso de forma presencial ou mediante o envío de comunicacións sobre os ámbitos de actuación da experiencia de "Ponte...nas ondas!".

Eses tolos baixiños

2010-03-23T12:46:00.000-07:00

Educación e Creatividade

2010-03-18T16:35:00.000-07:00

O sistema educativo está a formar ás persoas afastándoas da súa creatividade.
Un par de vídeos dunha interesante charla de Sir Ken Robinson, un experto internacional no desenvolvemento da creatividade, innovación e recursos humanos.

QUE ARTISTAS!

2010-03-05T13:55:00.000-08:00

NA ESCOLA DE MONTOUTO PINTAMOS UN GRAN CADRO, PERO EN LUGAR DE USAR AS MANS EMPREGAMOS OS NOSOS PEÍÑOS.

FOI MOI DIVERTIDO!

Orgullosos do noso, orgullosos do galego

2010-03-03T13:32:00.000-08:00

Este é o lema da campaña impulsada pola CGENDL (Coordinadora Galega de Equipos de Normalización Lingüística) que foi presentada o pasado 22 de Febreiro e que conta con colaboracións tan rechamantes como as de Luis Tosar e Susana Seivane, entre outros, nun dos seus vídeos promocionais.

Con iniciativas como esta preténdese combater os prexuízos ao respecto da lingua e favorecer que o alumnado "sinta fachenda" de falar galego.

Esta campaña dirixida á comunidade educativa ten como obxectivo fundamental, en palabrfas da propia CGENDL, "transmitirlle á comunidade educativa, que é coa que traballamos, pero tamén ao conxunto da sociedade galega, un sentimento que debería ser común a todos nós, independentemente da ideoloxía de cadaquén, da súa condición social ou do lugar onde se viva, independentemente da idade, sexo, raza, orixe ou cor de pel que teñamos." Preténdes transmitir que ..."ter unha lingua propia é unha SORTE, non unha desgraza, é un ORGULLO non un problema. Porque hai quen se empeña en ver, ou en facer ver, o galego como un problema, e non o é, é un motivo de ORGULLO. Por iso lanzamos esta campaña, para PRESUMIR do que somos, do que temos, do noso para FACHENDEAR da nosa lingua."

Na seguinte ligazón pódense consultar os vídeos promocionais, así como os contidos e materiais da campaña:

http://coordinadoraendl.org/orgullo/

Difundide esta campaña entre a vosa comunidade educativa e coñecidos!

55 mentiras sobre a lingua galega

2010-02-06T16:12:00.000-08:00

O pasado venres 5 de febreiro presentouse simultaneamente en 69 localidades diferentes de todo o mundo o libro 55 mentiras sobre a lingua galega promovido pola Plataforma a prol da defensa e promoción da lingua galega "Prolingua" e editado por Laiovento. Unha publicación que tenta desmontar as falacias sobre as que se asenta o discurso dos que tentan impedir a normalización da lingua galega.

Na seguinte ligazón pódense atopar a descrición deste libro altamente recomendábel, así como unha presentación resumo do seu contido: http://prolinguagalega.org/55-mentiras/

Queremos o ensino en galego!

2010-01-24T14:27:00.000-08:00

Dixémolo ben alto e claro o pasado xoves 21 de xaneiro os mestres/as e alumnos/as convocados á Folga contra as intencións do actual Goberno da Xunta a respecto do galego no ensino. A compostelá praza do Obradoiro ateigada de xente (moitas persoas non puideron nin entrar) son a imaxe clara de que "cargarse a nosa lingua" non lles vai ser tan doado como pensaban. A lexitimidade das urnas, que ninguén pon en entredito, non os autoriza a pasar por riba da legalidade e do consenso en materia de lingua dos que xa nos tiñamos dotado os galegos.

Preme na seguinte ligazón para comprobares que o consenso, tan demandado agora polo partido gobernante, foron eles precisamente os que o racharon. E son eles os que teñen que voltar ao mesmo. Os xornais son testemuña do seu cambio de rumbo en materia de normalización lingüística. Traballo dun compañeiro do CPI de Carral: http://www.slideboom.com/presentations/130332/UN-DECRETO-SEN-CRETO

Para máis información: análises das "Bases para o decreto do plurilingüismo", valoracións, alegacións, etc... http://www.coordinadoraendl.org/

O Apalpador: o "pai Noel" galego...

2009-12-07T15:57:00.000-08:00

Artigo tirado da páxina web http://www.oapalpador.com

O vello Apalpador, ou Pandegueiro como se lle chama en partes do oriente ourensán, é unha figura lendaria galega que achega os agasallos aos nenos polas datas do Nadal. Este xigante, de oficio carboeiro, baixaba das devesas e apalpaba as barriguiñas dos cativos. Se estaban cheas dicía: «así, así esteas todo o ano» e deixáballes unha presa de castañas. Senón calaba, pero deixáballes tamén as castañas.

Para tranquilizar aos rapaces, bulideiros pola inquedanza da chegada do Apalpador, os pais cantábanlles:

Vaite logo, meu meniño (miña meniña)

marcha agora para a camiña

Que vai vir o Apalpador

a apalparche a barriguiña.

Xa chegou o día grande

día do noso Señor.

Xa chegou o día grande

e virá o Apalpador.

Mañá é dia de cachela,

que haberá gran nevarada

e há vir o Apalpador

cunha mega de castañas.

Por aquela cemba

xa ven relumbrando

o señor Apalpador

para darvos o aguinaldo.

cachela=plancha furada para asar as castañas

mega=cesta para apañar castañas e outros froitos secos

cemba=parte elevada dunha montaña ou camiño

Na web http://www.apalpador.com/apalpador.pdf podedes baixar o conto do Apalpador con guión e ilustracións de Xoán González Otero.

E na http://www.oapalpador.com/node/20 láminas para colorear.

Documentos e textos legais

2009-11-20T01:12:00.000-08:00

Ligazón a algúns dos documentos e textos legais arredor da lingua

http://prolinguagalega.org/documentos/

O Tribunal Supremo: os pais non poden escoller a lingua de escolarización dos seus fillos

2009-11-20T01:01:00.000-08:00

(Este artigo foi publicado na web de Prolingua. Para accederes ao texto íntegro da sentenza preme na seguinte ligazón http://prolinguagalega.org/)

A noticia que publicaron hoxe 17 de Novembro os xornais Faro de Vigo e La Opinión da Coruña, na que se informa dunha sentenza que rexeita que os pais poidan escoller a lingua de escolarización dos seus fillos, é un motivo de satisfacción para ProLingua e para todas aquelas persoas que valoran especialmente a xustiza e a liberdade.
Os datos máis significativos da noticia poden lerse no texto que reproducimos aquí. Aínda que a sentenza á que se refire sexa moi relevante, polo momento en que se fai pública, en realidade non di nada novo, pois hai numerosas sentenzas, tanto do Tribunal Supremo como do Tribunal Constitucional que inciden nos mesmos razoamentos e principios que a que hoxe comentamos.
En Galicia, levamos máis dun ano asistindo á difusión reiterada de diversas mentiras relacionadas coa lingua propia do noso país. Deste xeito, tivemos que asistir con abraio á ruptura do consenso que significara o Plan Xeral de Normalización da Lingua (PXNL). Un documento elaborado por un amplo número de representantes dos diferentes ámbitos profesionais e, tras ser revisado por parte das forzas políticas, aprobado por unanimidade do Parlamento Galego en setembro do 2004. Non está de máis lembrar que o Goberno que impulsou e guiou o proceso estaba presidido por Fraga Iribarne, e o seu vicepresidente era Núñez Feijoo.
E, con máis abraio aínda, tivemos que asistir á fervenza de declaracións e artigos de opinión (difundidos amplamente polos poderes económicos e mediáticos) que pretendían facernos ver o mundo do revés: “la imposición del gallego”, “el derecho de los padres a la elección de lengua en la educación”, “el ataque a la libertad de los castellanohablantes”, “el castellano está discriminado” e outras arteiras falacias que aínda hoxe se seguen a escoitar.
O abraio converteuse en indignación cando comprobamos como o PP, rompendo todos os consensos, lle daba o seu apoio a estas mentiras. E como, tras vencer nas eleccións de marzo, comezaba desde a Xunta un intenso programa de ataques contra a lingua galega e as manifestacións culturais que se vehiculan a través dela. No caso do ensino, as reiteradas declaracións da Consellería contra o galego e a pouco rigorosa consulta ás familias foron os feitos máis relevantes.Aínda que o peor foi volver a consagrar o incumprimento do lexislado, como xa se observa nestes meses que levamos de curso.
Desde ProLingua, que naceu como reacción a estes insólitos ataques de un Goberno que, estatutariamente, ten a obriga de defender a lingua e a cultura de Galicia, lembramos unha vez máis o evidente:
- No ámbito da educación, son as institucións democráticas (estatais e autonómicas) as que deciden a estrutura do sistema educativo, os obxectivos que se queren conseguir, os currículos das diversas materias, a temporalidade, a formación esixida ao profesorado, os sistemas de avaliación, a lingua ou linguas de docencia…
- No ámbito lingüístico, un dos obxectivos esenciais do noso sistema educativo é conseguir que os alumnos e as alumnas acaden unha boa competencia nas dúas linguas oficiais, independentemente de cal sexa a súa lingua familiar.
- O anterior é esencial para podermos falar de liberdade lingüística. Se non se quere que haxa cidadáns de primeira e de segunda, teñen que crearse as condicións para que se poida vivir en galego coa mesma normalidade que o pode facer unha persoa castelán falante.
- Para iso é imprescindible que a poboación sexa competente nas dúas linguas oficiais, para que logo cadaquén poida decidir libremente se usa unha ou outra nos diferentes ámbitos e situacións. É dicir, a dobre competencia é imprescindible para garantir a liberdade lingüística. Unha dobre competencia que xa cumprimos todos os cidadáns que temos como lingua de instalación o galego. Pois non se debe esquecer que a oposición entre castelán falantes e galego falantes é, en boa medida, unha falsidade. En todo caso, a oposición será entre os que temos competencia bilingüe e os que se encastelan no mantemento da competencia monolingüe vivindo nun país con dúas linguas oficiais.
- Para garantir que todo o alumnado remate os estudos cunha boa competencia nas dúas linguas precísase unha planificación lingüística que garanta a súa consecución. Esa planificación pasa pola utilización maioritaria como vehicular da lingua máis desfavorecida socialmente, como xa se indicaba no PXNL. Cómpre lembrar que o propio Tribunal Constitucional avalou como lexítimo “un trato desigual, que non discriminatorio, para as dúas linguas oficiais en función do carácter propio dunha delas que fai preciso unha acción normalizadora que debe, necesariamente, implicar accións de apoio singularizado”. E isto, en vez de ir contra a liberdade lingüística, é, precisamente, unha actuación imprescindible para garantir esa liberdade.
- Por todo isto, celebramos que as ideas segregadoras e negacionistas veñan de ser rexeitadas polo Tribunal Supremo. E desexamos que o actual Goberno tome boa nota e comprenda que para que non haxa cidadáns de primeira e de segunda en función da lingua que falen, son precisas as políticas lingüísticas que tenten corrixir as desigualdades existentes e garantan o dereito constitucional a empregar con normalidade a lingua habitual (sexa o galego ou o castelán) en calquera ámbito da vida diaria.

Celebracións do Outono: Samaín e Magosto

2009-11-15T12:27:00.000-08:00

O pasado venres 13 (que data máis acaída para celebrarmos o Samaín!) todas as escolas do noso CRA xuntámonos para festexar o Samaín e máis o Magosto. A festa comezou enfeitando o local da escola de San Cristovo para a ocasión coas grilandas, as cabazas feitas polo alumnado e a exposición dos traballos manuais feitos a base de castañas e landras. Elaboramos un "castañón" que os rapaces pintaron e encheron con papeis de xornais. A idea era queimalo fóra, mais o tempo non o permitiu. Logo, houbo obradoiro de maquillaxe de Samaín e obra de teatro a cargo dos mestres/as para escorrentar os medos. Para recuperarnos das emocións da obra de teatro, a bruxa "Curuxa" fíxonos unha beberaxe reconstituínte que non todos foron quen de probar. Houbo degustación de manxares do Samaín e as castañas do Magosto. Logo, xa con máis folgos, rematamos a festa cantando e bailando a ritmo de acordeón, pandeireta e cunchas.

Iª Asemblea Xeral da CGENDL

2009-11-15T12:12:00.000-08:00

Iª ASEMBLEA XERAL DA CGENDL:
A CGENDL AFIRMA QUE NON TERÁ NIN MEDO NIN PREGUIZA PARA TRABALLAR NA NORMALIZACIÓN DA LINGUA GALEGA

O sábado 7 de novembro, un cento de representantes dos Equipos de Normalización e Dinamización Lingüística de centros escolares públicos e privados chegados de toda Galicia reuníronse na Iª Asemblea da Coordinadora Galega de ENDL.
No transcurso da Asemblea aprobáronse os principios que rexerán este colectivo, así como o seu plano de traballo anual, que incluirá unha campaña de sensibilización dirixida á comunidade escolar, programas de intercambio entre estudantes, fomento do galego nas novas tecnoloxías, entre outras actividades que os ENDL realizarán a pesar do recortes dos apoios institucionais.
Así mesmo, aprobouse o organigrama da CGENDL e escolleuse por unanimidade o seu Consello Directivo para os próximos dous anos. Na clausura do acto, Valentina Formoso, que resultou elixida Coordinadora Xeral, repasou a traxectoria do colectivo dende o seu nacemento e marcou as liñas de actuación para o futuro inmediato. Neste sentido, anunciou a vontade da Coordinadora de non ter “nin medo nin preguiza para traballar na normalización da lingua galega”.

ANDORIÑA!!

2009-06-23T11:37:00.000-07:00

Xa está na rúa o novo número da nosa revista escolar: ANDORIÑA 08-09

Agardamos que vos guste!

Preme na imaxe para acceder ao contido da revista.

En defensa do galego: Belén Regueira

2009-05-11T02:43:00.000-07:00

Créase a Coordinadora Galega de ENDL

2009-04-01T15:01:00.000-07:00

O sábado 28 de marzo tivo lugar en Compostela unha reunión á que asistiron perto dun cento de coordinadores e membros de ENDL (Equipos de Normalización e Dinamización Lingüística) na que acordaron a creación da Coordinadora Galega de Equipos de Normalización e Dinamización Lingüística.

O obxectivos da Coordinadora pasan por tratar de establecer dinámicas de colaboración entre os diferentes equipos e unha cooperación que permita compartir experiencias normalizadoras que redunden positivamente no traballo da dinamización lingüística nos centros de ensino galegos.

Unha das primeiras accións a realizar é a de recabar apoios dos ENDLs ao texto que se consensuou o sábado pasado. En dito texto solicítaselle ao novo goberno galego que manteña os compromisos acordados pola comunidade educativa e o Parlamento galego no Plan xeral de normalización da lingua galega.

A coordinadora convida todos os Equipos de Normalización a que apoien o texto resultado do debate do sábado pasado. Para facelo, poden enviar un fax no que se identifique o centro educativo, o concello no que está situado e os datos persoais do coordinador ou coordinadora ao 981800064 ou na páxina web http://www.coordinadoraendl.org/

Benvidos a Galeguízate!

2009-01-30T01:07:00.000-08:00

Este é o blog do Equipo de Normalización e Dinamización Lingüística do CRA Santa Comba. Nace co obxectivo de dar a coñecer o traballo que realizamos desde o ENDL mais tamén desde as titorías das nosas escolas. Pretende tamén ser un medio no que reflectir o pulso vital da nosa lingua. Agardamos as vosas suxestións e colaboracións.